𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

𝗣𝗮𝗺𝗶𝗯𝗶 𝘀𝗮 𝗘𝗻𝗼𝘁 𝗻𝗮 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Omboy na Lawog ni Jesus:

Misterio kan Pagkani-laman asin Pagkamundag ni Jesus

Kan mag-abot an kapanoan kan panahon, isinubol kan Diós an saiyang Akì, namundag sa Babae… Isinubol kan Dios an Espiritu kan saiyang Akì sa satong mga puso, espiritu na nagkukurahaw: “¡Abba! ¡Ama!” (Gal. 4, 4-6)

O Jesus, sa dakulang pagpakumbabâ asin pagkamakinuyog-kuyog, asin sa kautoban kan panugâkan Amâ sa pagpadara nin Mesías, ika nani-laman sa popônan ni Virgen María asin namundag sa kinâban. An saimong Omboy na Lawog, na maogmang namansayan ninda San José asin Santa María, mga Pastores asin mga Mago, Simeon asin Ana, dakulang paglaom niamo, na kami man mga akì nin Diós, na hale sa puso nag-aapod saiya: “¡Abba! ¡Amâ!” 

O makawiwiling Omboy na Lawog ni Jesus! Tâdaw ta si Herodes na tampalasan boót kang gadanon? Dai niamo mahonâ-honà an kasakitan na tulos idinolot saimo kan kinâban dawà ngani ika namumundag pa sana. 

O Divino Rostro, kaheraki kami, asin antabayan sa samong pag-atubang sa mga kasakitan na dara kan kinâban. Iparayô mo kami sa makuring pagsakit, alagad, siring kan pagluha mo nin dugo sa Getsemani: “bako an kabôtan ko, kundi, an kabôtan kan Diós Amâ an mangyari.” Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮𝗱𝘂𝘄𝗮𝗻𝗴 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Barobata na Lawog ni Jesus:

Misterio kan Pagtalubo ni Jesus sa Lindong kan Pangataman kan saiyang mga Magurang

(Si Jesus) naghilig kaiba (kan saiyang mga magurang) asin nagpa-Nazaret: makinuyog-kuyog sya sainda. Rinimpos kan saiyang Inâ an gabos sa saiyang puso. Si Jesus nagtatalubo sa kadonongan, edad asin gracia sa atubang nin Dios asin mga tawo. (Lc. 2, 51)

O Jesus, dakula an pag-mâwot mo sa pag-utob kan kabôtan kan Amâ, kaya nagpawalat ka sa Templo. Alagad, dahil dai pa napapanahon, dawà ngani mâwot mo mag-erok sa harong kan saimong Amâ, ika nagkuyog sa saimong mga magurang, asin nag-iba sa Nazaret sa pagpairarom sa lindong kan saindang pangataman. 

An saimong Barobatang Lawog, na nagdara nin dakulang pagkangalas sa mga Paratukdo huli sa saimong hararom na pakasabot asin mga simbag, magin man lugod samong karîgonan sa samong pagtalubo sa kadonongan, edad asin gracia. O makiuyog-kuyog na Barobatang Lawog ni Jesus! Tâdaw ta dakul an ngonian dai naghihinanyog saimo? Dai niamo masabotan an samong pagkabongog sa saimong Tataramon. 

O Divino Rostro, kaheraki kami, asin patawadon mo an samong mga pagbasang-basang siring sa ginibong paghadok saimo ni Judas na tampalasan. Tabangan mo kami, na maghinanyog asin isabuhay an saimong Tataramon, siring man tukdoan kami nin tamang pagkuyog sa mga nanonongdan sa samo. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮𝘁𝗼𝗹𝗼𝗻𝗴 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus kan siya Binonyagan: Misterio kan Sacramento nin Bonyag

Nag-abot si Jesus haleng Nazaret Galilea asin binonyagan ni Juán sa Jordan. Tulos, paghâwas sa tubig, nahiling niyang nabubuksan an langit asin an Espiritu, garo salampati, nagtutugdon saiya. Asin sarong tingog duminatong hale sa langit: “Ika an sakong Akì, an namomòtan; ika an sakong pigmarhayan.” (Mc. 1, 9-11)

O Jesus, dawà dai nin salà, nagpabonyag ka sa 

nag-alang-alang na si San Juán Bautista, tanganing itukdo samo an halangkaw na kahulugan kan Bonyag na itinugdas mo bilang Sacramento. An saimong Lawog kan ika binonyagan, pagiromdom samo, na kan kami man binonyagan, naghilig samo an Espiritu Santo, asin kami nagin makawiwiling mga akì kan mahal na Diós.

O malinigon na binonyagan na Lawog ni Jesus! Tâdaw ta pinabayaan mi na madigtaan nin kasâlanan samong binonyagan na lawog? An samong kasâlan, garo samong pagsokiti sa Mahal mong Lawog!

O Divino Rostro, kaheraki kami, asin tabangan na panindogan an samong panugâ sa Bonyag, na “isikwal si Satanas asin an kasâlan; asin magtubod sa Diós Amâ, Diós Akì asin Dios Espiritu Santo; asin sa Banal na Catolicong Simbahan. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝗮𝗽𝗮𝘁 𝗻𝗮 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus sa saiyang Pagharubay kan Kahadean nin Diós: Misterio kan Kahadean kan Diós

Uminabot si Jesus sa Galilea, ihinaharubay an evangelio nin Diós asin nagsasabi: “Nautob na an panahon, harani na an kahadean nin Diós; magbaklê kamo asin magtubod sa evangelio!” (Mc. 1, 14-15)

O Jesus, nakamumuyang pagmasdan an saimong Lawog sa pagharubay mo kan Kahadean nin Diós. Makawiwiling pagdangogon an saimong mga mahamis na Tataramon tanganing mamidbidan niamo an Diós Amâ na labi-labing namomoot samo. An Saimong mga katukdoan asin pagpaomay sa mga may helang asin kapansanan, mga pagpatotoo na ika an Mesias, an Cristo na sinugo kan Amâ sa pagtubos samo.

O Maomayon na naghaharubay na Lawog ni Jesus! Tâdaw ta pinapabayaan mi, na an saimong mga pagharubay na naglaog sa sarong talinga, magluwas sa ibong na talinga? Kami nakakadangog alagad dai man naghihinanyog; may talinga, alagad, bongog.

O Divino Rostro, kaheraki kami, asin patawadon mo an samong mga pag-olog-olog saimo, orog na an dai paghinanyog kan saimong pagharubay kan Kahadean nin Diós. Paomayan mo man tabi an samong mga kahelangan asin kapansanan. Orog na tabangan mo kami sa pagbaklê, asin pataluboon mo an samong pagtubod sa Evangelio. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝗹𝗶𝗺𝗮𝗻𝗴 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus kan Transfiguracion: Misterio kan Transfiguracion

Ipinag-iba ni Jesus si Pedro, si Santiago saka si Juán; asin dinara sinda sa halangkaw na bukid, sinda sana. asin natransfigurar siya sa atubang ninda. (Mc. 9, 2)

O Jesus, sa pag-ultanan kan saimong ministerio kan pagharubay kan Kahadean kan Diós, asin kan saimong Mahal na Pasion, an saimong pagka-Dios, ipinamalas mo. An Mahal na Lawog mo kan Transfiguracion, liwat, nagpahayag kan Pagkasarô mo sa Diós Amâ asin Diós Espiritu Santo siring kan nangyari kan ika binonyagan.

O maliwanagon na Lawog ni Jesus kan Transfiguracion! Tâdaw ta dai minidbid kan mga tampalasan an saimong pagka-Diós? Malà ngani hinampak pa an saimong mahal na Hawak, asin kinoronahan nin tonok an saimong mahal na Payo sa pag-olog-olog saimo. 

O Divino Rostro, kaheraki kami, asin patawadon mo kami ta huli sa kasâlan niamo, dinagdagan mi pa an paghampak asin pagkorona nin tonok sa saimo. Darhon mo kami sa pagkalinig kan samong hawak asin kalag, na matransfigurar man kami sa Ngaran mo, tanganing magkanigo na makahiling  kan saimong mamurawayon na Lawog. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝗮𝗻𝗼𝗺 𝗻𝗮 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus sa saiyang Pagsakit asin Pagkagadan: Misterio kan Ecce Homo

Nagluwas na gayo si Jesus, nakokoronahan nin tonok asin nagugubingan nin purpura. Asin nagsabi (si Pilato) sainda: “¡Uya an tawo!”. Kan mahiling siya kan mga poon na padi asin kan mga tawohan, nagkurahaw sinda: “¡Ipako sa cruz, ipako sa cruz!” (Jn. 19, 5-6)

O Jesus,” siring na nangirhat sa panhinayang (saimo) an dakul, ta naraot an (saimong) itsura, bako na sa-tawo, asin an (saimong) anyo, bako na sa akì ni Adan” (Is. 52, 14), ako man napapanô nin matagom na kamundoan, asin an sakong puso nagluluha sa pag-agrangay, sa ginibo niamong paglapastangan sa saimong matubis na Lawog.

O matinios na Lawog ni Jesus kan Pagsakit asin Pagkagadan! Tâdaw ta naginibo mi ini saimo? Alagad, nagpapasalamat kami, ta natalâ sa lienzo ni Santa Veronica an saimong Lawog, tanganing igwa kami nin mabansay na paggiromdomon, na an gabos na pagsakit mo, ginibo mo sa dakulang pagkamoot na matubos kami sa kasâlan.

O Divino Rostro, kaheraki kami, asin an saimong Lawog danay niamong pagsambahon, orog na, na ini man an Maheherakon na Lawog kan Amâ. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝗽𝗶𝘁𝗼𝗻𝗴 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus sa Kalayo kan Espiritu Santo: An Misterio kan Paghilig kan Espiritu Santo

Dangan nagpahiling sainda nakataltag na mga dila na garo kalayo na tuminugdon sa lambang sarô sainda. Napanô sinda gabos kan Espiritu Santo. (Gibo 2, 3-4)

O Jesus, tanganing dai magin ilo an saimong mga disipulos, hinangos mo sainda an saimong Espiritu. Pag-abot kan aldaw nin Pentecostes, huminilig sainda an Espiritu Santo. Napanô kan balaog kan Espiritu Santo, an saimong mga disipulos nagpoon sa pagbalangibog kan Saimong Marhay na Bareta, na nagin simbolo kan Pagkamundag kan Simbahan, na itinalaga mo sa pagpadagos sa pagdara sa katawohan na makabalik sa Diós.

O Diósnon na Lawog ni Jesus sa Kalayo kan Espiritu Santo! Liwat ipinahayag mo an Pagkasarô nindo kan Diós Amâ asin Diós Espiritu Santo, sa pagkamoot asin pagmâwot na kami makasaro man sa Santisima Trinidad.

O Divino Rostro, kaheraki kami, asin sa pagpanô mo samo kan Saimong Espiritu kan kami binonyagan asin kinumpil, palaada an Kalayo kan Espiritu Santo samo, tanganing imbes na matakloban asin masayang, magliwanag sa samong buhay asin maglakop sa kinâban. Danay niamo lugod midbidon an Balaog kan Espiritu Santo, tanganing matalâ nanggad sa samong buhay. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝘄𝗮𝗹𝗼𝗻𝗴 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus sa Kalayo kan Espiritu Santo: An Misterio kan Paghilig kan Espiritu Santo

Dangan nagpahiling sainda nakataltag na mga dila na garo kalayo na tuminugdon sa lambang sarô sainda. Napanô sinda gabos kan Espiritu Santo. (Gibo 2, 3-4)

O Jesus, tanganing dai magin ilo an saimong mga disipulos, hinangos mo sainda an saimong Espiritu. Pag-abot kan aldaw nin Pentecostes, huminilig sainda an Espiritu Santo. Napanô kan balaog kan Espiritu Santo, an saimong mga disipulos nagpoon sa pagbalangibog kan Saimong Marhay na Bareta, na nagin simbolo kan Pagkamundag kan Simbahan, na itinalaga mo sa pagpadagos sa pagdara sa katawohan na makabalik sa Diós.

O Diósnon na Lawog ni Jesus sa Kalayo kan Espiritu Santo! Liwat ipinahayag mo an Pagkasarô nindo kan Diós Amâ asin Diós Espiritu Santo, sa pagkamoot asin pagmâwot na kami makasaro man sa Santisima Trinidad.

O Divino Rostro, kaheraki kami, asin sa pagpanô mo samo kan Saimong Espiritu kan kami binonyagan asin kinumpil, palaada an Kalayo kan Espiritu Santo samo, tanganing imbes na matakloban asin masayang, magliwanag sa samong buhay asin maglakop sa kinâban. Danay niamo lugod midbidon an Balaog kan Espiritu Santo, tanganing matalâ nanggad sa samong buhay. Amen.

𝗣𝗮𝗺𝗶𝗯𝗶 𝘀𝗮 𝗜𝗸𝗮-𝘀𝗶𝘆𝗮𝗺 𝗻𝗮 𝗔𝗹𝗱𝗮𝘄 𝗸𝗮𝗻 𝗡𝗼𝘃𝗲𝗻𝗮 𝗸𝗶 𝗗𝗶𝘃𝗶𝗻𝗼 𝗥𝗼𝘀𝘁𝗿𝗼

An Lawog ni Jesus sa mga Sacramento: An Misterio kan mga Sacramento

Ginarod an saiyang hirog kan sarô sa mga soldados, asin tulos luminuwas dugo asin tubig. (Jn. 19, 34)

O Jesus, an pagbolos kan dugo asin tubig hali sa saimong Hirog, nagin simbolo kan pagtugdas mo kan mga Sacramento, na mga Tanda kan pagwaras mo nin gracia, hale sa kairaroman kan saimong pagkamaboót asin pagkamoot sa samo. Itinugon mo sa Simbahan an pagwaras kan mga Sacramento, tanganing sa lambing estado kan samong buhay, mapanô kami nin Gracia.

O Mapangyaring Lawog ni Jesus sa mga Sacramento! Ika an Diósnon na Burabod nin gracia asin bendicion, na danay na nagbubulos asin nunca maaati.

O Divino Rostro, kaheraki kami. Sa pagtapos mi kaining novena, siring na natalâ sa lienzo ni Santa Veronica an saimong Mahal na Lawog, sa pag-akò niamo kan mga Sacramento, orog na kan Sacramento nin Kumpisal asin Eucaristia, “tandaan mo kami kan liwanag na iyo an saimong Lalawgon, Kagurangnan” (Salmo 4, 7), asin matalâ man nanggad sa samong isip asin boót, tataramon asin gibo, sa bilog ming buhay, an saimong Mahal na Lawog. Amen.