KARARAG TI PANNAKAIDATON KEN SAN JOSE (Ilokano)

Agragsakka, San Jose,

Saluad ti Mannubbot,

Asawa ni Birhen Santa Maria.

Intalek kenka ti Dios nga Ama ti Bugbugtong nga Anakna.

Inted kenka ni Maria ti amin a panagtalekna;

Iti sidongmo nagbalin a tao ni Jesukristo.

Sikakaysa ken Apomi a Jesukristo ken iti Nainggasatan nga Ina,

Daydayawendaka nga addaan natarnaw nga ayat ken panagraem.

Piliendaka ita nga aldaw a kas amami,

Agaywan ken mangsalaknib kadakami.

Impaay ti Dios nga Ama a rambakanmi

daytoy a tawen a kas pammadayawmi kenka

ket kasta pay daytoy a tawen ti naragsak a maika-500 nga anibersario

iti pannakaam-ammomi ken Cristo ditoy pagilianmi.

Dagiti napnoan panagyaman a puspusomi,

bigbigendaka a maysa a naindaklan a sagut ti Dios kadakami

tapno agserbika a kas maysa a kadkaduami,

maestro, ulidan ken salaknibmi iti daytoy a tawen ti Hubileo.

Umasidegkami kenka tapno idatonmi dagiti tattaomi, ti Iglesia ditoy Filipinas,

dagiti Diosesis, dagiti parokiami ken dagiti pamiliami.

Iti naamaan nga ayat ken pammateg,

pinatanor ken binangonmo ti biag ti Nasantoan a Pamilia ti Nazaret.

Sipapakumbaba a dawatenmi kenka, a bendisionam dagiti gannuatmi

ket tulongannakami a mangbangon ti Iglesia, ti Bagi ni Jesucristo,

iti sidong ti natulnog a pammati, napudno nga ayat

ken awanan panagkapsut a namnama iti managayat nga Ama.

Kankanayonka a sidadaan a dimngeg

ken nagtulnog iti pagayatan ti Ama

ket sinalaknibam ni Jesus manipud iti amin a peggad.

Ikanawanakami kadi manipud iti amin a pagpeggadan a mangdadael kadagiti tagipatgen

ken pannursuro ti Ebanghelio iti pagilianmi.

Salaknibannakami iti pannaki-dangadangmi

kadagiti sakit ti bagi ken kararua iti kagimonganmi.

Italekmi kenka dagiti amin a kalikagum ken tartarigagaymi

a mangiturong iti pannakaisalakanmi.

Italekmi kenka dagiti pamiliami

ken dagiti amin nga amma tapno agbalinda a napudno iti bokasionda

a kas sarming ti ayat ti Ama nga adda’t sadi langit.

Italekmi kenka dagiti amin a gannuat ken tignaymi

a mangsaranay kadagiti kakabsatmi nga agsagsagaba.

Kenka San Jose, sumaruno kada Jesus ken Maria,

idatonmi ti bagi ken kararuami, amin a kinasiasinomi ken amin nga adda kadakami.

Apo San Jose, ipariknam met kadakami nga amadaka.

Tarabayennakami iti dalan ti biag.

Igun-odannakami iti grasia, asi ken tured,

ket ikanawanakami manipud iti amin a dakes.

Amen.